Agjencia e Regjistrimit Civil e Ministrisë së Punëve të Brendshme ka pranuar rreth 110 kërkesa nga qytetarët për t’u pajisur me Patentë Shoferë Ndërkombëtarë.

Agjencia e Regjistrimit Civil kishte njoftuar qytetarët se nga data 1 tetor do të hapet aplikimi për  t’i pranuar kërkesat për aplikim për Patentë-Shofer Ndërkombëtar, shkruan arbresh.info.

Sipas zëdhënëses për media në MPB, Rroksana Qarri nga data 1 tetor deri me tani janë pranuar rreth 110 kërkesa.

Në përgjigje thuhet se kriter për tu pajisur me patentë shofer ndërkombëtar është posedimi i patentë shoferit të Kosovës.

“Kriter për pajisje  me  patentë shofer  ndërkombëtar është  posedimi i  patentë shoferit të RKS-së me afat vlefshmërie jo më pak se 6 muaj,  procedurat   janë  përcaktuar  në  Udhëzimin Administrativ Nr.08/2020, për Përcaktimin e Formës, Përmbajtjes dhe Procedurës së Lëshimit të Patentë Shoferëve ndërkombëtar në Republikën e Kosovës”, thuhet në përgjigje për portalin arbresh.info.

Aplikimi do të bëhet në të gjitha Qendrat për Pajisje me Dokumente, sipas procedurave të përcaktuara në Udhëzimin Administrativ për Përcaktimin e Formës, Përmbajtjes dhe Procedurës së Lëshimit të Patentë Shoferëve ndërkombëtar në Republikën e Kosovës.

Sipas Udhëzimit Administrativ patentë shoferi ndërkombëtar – është dokument plotësues i cili i mundëson mbajtësit ta drejtojë automjetin në ato shtete jashtë Kosovës të cilat e kërkojnë këtë dokument plotësues sipas konventës së Vjenës për Trafikun Rrugor të datës 8 Nëntor.

Po ashtu në këtë udhëzim bëhet e ditur se ky patentë shofer është i vlefshëm për territoret e të gjitha palëve të tjera kontraktuese, me kusht që të paraqitet me patentë-shoferin kombëtar. /arbresh.info/